ரூ.15 லட்சம் விவகாரம்… ஸ்டாலினுக்கு பா.ஜ.க. எம்.எல்.ஏ. ‘செக்’!

15 லட்சம் ரூபாய் தருவதாக பிரதமர் மோடி சொன்னதற்கான ஆதாரத்தை ஸ்டாலின் வெளியிட வேண்டும். இல்லாவிட்டால் மக்களிடம் பகிரங்க மன்னிப்புக் கேட்க வேண்டும் என்று பா.ஜ.க. எம்.எல்.ஏ. வானதி சீனிவாசன் செக் வைத்திருக்கிறார்.

கடந்த சில தினங்களுக்கு முன்பு திராவிட இயக்க நிர்வாகி இல்லத் திருமண விழாவில் கலந்துகொண்டு பேசிய முதல்வர் ஸ்டாலின், நாங்கள் ஆட்சிக்கு வந்தால் கருப்புப் பணத்தை மீட்டு, ஒவ்வொருவரின் வங்கிக் கணக்கிலும் 15 ரூபாய் போடுவதாக பிரதமர் மோடி கூறினார். 15 லட்சம் அல்ல, 15 ரூபாயாவது கொடுத்தார்களா என்று கேள்வி எழுப்பி இருந்தார். இதையடுத்து, மோடி ஹிந்தியில் பேசிய வீடியோவை வெளியிட்டு, தமிழில் பைலைன் கொடுத்து பதிலடி கொடுத்திருந்தார் தமிழக பா.ஜ.க. தலைவர் அண்ணாமலை.

இந்த சூழலில், பா.ஜ.க. மகளிரணி தேசியத் தலைவியும், தமிழகத்தின் கோவை தெற்கு தொகுதியின் எம்.எல்.ஏ.வுமான வானதி சீனிவாசன், பிரமதர் மோடி 15 லட்சம் ரூபாய் தருவதாகச் சொன்னதற்கான ஆதாரத்தை ஸ்டாலின் வெளியிட வேண்டும். இல்லாவிட்டால் மக்களிடம் பகிரங்க மன்னிப்புக் கேட்க வேண்டும் என்று வலியுறுத்தி அறிக்கை வெளியிட்டிருக்கிறார். அந்த அறிக்கையில், வானதி கூறியிருப்பதாவது…

“ஜூன் 9-ம் தேதி திமுக பிரமுகர் இல்ல திருமண விழாவில் பேசிய முதலமைச்சர் திரு. மு.க.ஸ்டாலின், “மகளிர் உரிமைத் தொகை வழங்கும் திட்டத்தால் சிலருக்கு எரிச்சல், ஆத்திரம், பொறாமை ஏற்பட்டிருக்கிறது. அதனால் வாய்க்கு வந்தபடி எல்லாம் விமர்சிக்கிறார்கள். 2014 மக்களவைத் தேர்தலுக்கு முன்பு ஒரு நபருக்கு ரூ. 15 லட்சம் வழங்குவேன் என பிரதமர் திரு. நரேந்திர மோடி உறுதிமொழி தந்தார். ஆனால், ரூ. 15 கூட தரவில்லை” என, பிரதமர் மோடி பேசாத ஒன்றை, அப்பட்டமான பொய்யை கொஞ்சம்கூட கூச்சம் இல்லாமல் கூறியிருக்கிறார்.

2014 மக்களவை தேர்தல் பிரசாரத்தின்போது, “வெளிநாடுகளில் பதுக்கப்பட்டுள்ள கருப்பு பணத்தை மீட்டால், ஒவ்வொரு இந்தியருக்கும் ரூ. 15 லட்சம் கொடுக்கும் அளவுக்கு இருக்கும்” என்றார். ஊழல் அரசியல்வாதிகளும், அவர்களின் பினாமி தொழிலதிபர்களும் பதுக்கிய பணத்தின் அளவை, மக்களுக்கு புரிய வைப்பதற்காக அவ்வாறு பிரதமர் மோடி பேசினார். ஆனால், இந்த உண்மையை திட்டமிட்டு மறைத்து விட்டு, இந்தியர்கள் ஒவ்வொருவருக்கும் ரூ. 15 லட்சம் வழங்குவதாக பிரதமர் மோடி வாக்குறுதி அளித்தார் என, காங்கிரஸ், திமுக உள்ளிட்ட ஊழலில் திளைத்த, திளைக்கும் கட்சிகள் மக்களிடம் பொய்யை பரப்பி வருகின்றனர்.

2019 மக்களவைத் தேர்தலுக்கு முன்பும், இந்த கட்டுக்கதையை பரப்பி மக்களை ஏமாற்ற நினைத்தார்கள். ஆனால், மக்களிடம் அது எடுபடவில்லை. 2014-ல் 282 தொகுதிகளில் வென்ற பாஜக, 2019-ல் 303 தொகுதிகளில் வென்றது. ரூ. 15 லட்சம் தருவதாக பிரதமர் மோடி வாக்களித்தார் என, முதலமைச்சர் ஸ்டாலினும், அமைச்சர்கள், திமுக தலைவர்களும் தொடர்ந்து கட்டுக்கதையை பரப்பி வருகின்றனர். முதலமைச்சரின் மகனும் அமைச்சருமான உதயநிதியும் இந்த புரட்டை திரும்ப திரும்ப கூறி வருகிறார்.

முதலமைச்சர், அமைச்சர் போன்ற முக்கியப் பொறுப்பில் இருப்பவர்கள் ஒரு பொய்யை திரும்ப திரும்ப கூறி வருவது கடும் கண்டனத்திற்குரியது. இந்தியர்கள் ஒவ்வொருவருக்கும் ரூ. 15 லட்சம் வழங்குவேன் என பிரதமர் மோடி பேசியற்கான ஆதாரத்தை முதலமைச்சர் ஸ்டாலினும், அமைச்சர் உதயநிதியும் வெளியிட வேண்டும். இல்லையெனில் தாங்கள் பேசியதற்கு மக்களிடம் பகிரங்க மன்னிப்பு கேட்க வேண்டும்” என்று கூறியிருக்கிறார்.