ஆர்.எஸ்.எஸ் சேவா சங்கத்தின் மூன்று நாள் மாநாடு!

ராஷ்ட்ரிய ஸ்வயம்சேவக சங்கத்தின் (ஆர்.எஸ்.எஸ்) வழிகாட்டுதலில் செயல்படும் ராஷ்டிரிய சேவா பாரதியால் ஏற்பாடு செய்யப்பட்ட ராஷ்ட்ரிய சேவா சங்கம் என்ற மூன்று நாள் மாநாடு ஏப்ரல் 7ம் தேதி கோலாகலமாக துவங்கியது. ராஜஸ்தான் மாநிலம் ஜெய்ப்பூர் அருகே ஜம்டோலியில் உள்ள கேசவ் வித்யாபீடத்தில் இந்த மாநாடு நடைபெற்றது. ஐந்து வருடங்களுக்கு பிறகு நடைபெறும் இந்த மாநாடு ‘தன்னம்பிக்கையான சமுதாயம் மற்றும் தன்னம்பிக்கையான இந்தியாவை’ உறுதி செய்வதற்கான தீர்மானத்துடன் ஏப்ரல் 9ம் தேதி ஞாயிற்றுக்கிழமை நிறைவடைந்தது.

இந்த மாநாட்டில் தமிழகம், தெலுங்கானா, மிசோரம், மேகாலயா, நாகாலாந்து, லடாக் உள்ளிட்ட மாநிலங்களைச் சேர்ந்த 515 பெண்கள் உட்பட 2,756 பிரதிநிதிகள் கலந்துகொண்டனர். சுயசார்பு மற்றும் வளமான இந்தியாவுக்கான உறுதிமொழியை எடுத்துக்கொண்டனர். இந்த நிகழ்வில் 95 பெண்கள் உட்பட 820 அமைப்பாளர்கள் புதுமை, தொடக்கங்கள் மற்றும் சுயதொழில்களை ஊக்குவிப்பதில் கவனம் செலுத்தினர்.

நாட்டின் பல்வேறு அமைப்புகள் மற்றும் நிறுவனங்களை சேர்ந்த 4000 பிரதிநிதிகளும் இந்த மாநாட்டில் பங்கேற்றனர். அவர்கள் தங்கள் நிறுவனத்தின் சாதனைகள், அதன் தொலைநோக்கு மற்றும் எதிர்கால முயற்சிகளை மாநாட்டில் எடுத்துரைத்தனர். அதே நேரத்தில் வழக்கு ஆய்வுகள், ஆராய்ச்சிப் பணிகள், புத்தகங்கள் மற்றும் பிற வெளியீடுகளும் முன்வைக்கப்பட்டன. பெண் குழந்தைகளின் முன்னேற்றம் குறித்து 50-க்கும் மேற்பட்ட ஆய்வுகள் சமர்பிக்கப்பட்டன.

மாநாட்டின் முதல் நாளில் ஆர்.எஸ்.எஸ். அமைப்பின் சர்சங்கச்சாலக்கான டாக்டர் மோகன் பாகவத் மாநாட்டை துவக்கி வைத்து பேசும் போது இவ்வாறு கூறினார் ; தென்மாநிலங்களில் இந்து ஆன்மிக குருக்களின் சமூக சேவை மிஷனரிகள் வழங்கியதை விட பல மடங்கு அதிகம். ஆனால் இது போட்டிக்கான விஷயம் அல்ல என்று அவர் கூறினார்.

‘‘நாட்டில் உள்ள அறிவுஜீவிகள் சமூகத்திற்கு சேவை செய்வது பற்றி பேசும்போது பொதுவாக கிறிஸ்தவ மிஷனரிகளை மட்டுமே குறிப்பிடுகிறார்கள். மிஷனரி அமைப்புகள் உலகம் முழுவதும் பல்வேறு நிறுவனங்கள், பள்ளிகள் மற்றும் மருத்துவமனைகளை நடத்துகின்றன. இது அனைவருக்கும் தெரியும். ஆனால் அதேசமயம் இந்து பிராமண சமூகம் என்ன செய்தது? இந்த சிந்தனையுடன் சென்னையில் இந்து சேவை கண்காட்சி நடத்தப்பட்டது. அங்கு தமிழ், கன்னடம், தெலுங்கு, மலையாளம் பேசும் மாநிலங்களில் ஆச்சார்யர்கள், முனிகள், சன்யாசிகள் செய்த சேவைகள் மிஷனரிகள் செய்யும் சேவையை விட பல மடங்கு அதிகம் என்பது கவனிக்கப்பட்டது. ஆனால் நான் இதை இருதரப்புக்கும் இடையே போட்டியை ஏற்படுத்த இதை பற்றி பேசவில்லை. இது சேவையின் அளவுகோலாக இருக்க முடியாது. சேவை என்பது போட்டிக்கான விஷயம் அல்ல. சேவை என்பது மனிதனின் மனிதநேயத்தின் இயல்பான வெளிப்பாடு.

விலங்குகளும் உணர்திறன் கொண்டவை, ஆனால் உணர்திறன் மூலம் செயல்படுவது மனித குணம். இது கருணை என்று அழைக்கப்படுகிறது. சமூகத்தில் இருந்து பின்தங்கிய நிலையை ஒழிக்க வேண்டியதன் அவசியத்தை வலியுறுத்திய மோகன் பாகவத், சமுதாயத்தில் அனைவரும் சமம் என்று தெரிவித்தார். “நாம் அனைவரும் சமூகத்தின் ஒரு பகுதி; நாம் அனைவரும் ஒன்றாக இருக்கிறோம். நாம் ஒற்றுமையாக இல்லாவிட்டால், நாம் முழுமையற்றவர்களாக இருப்போம். நம் சமுதாயத்தில் ஏற்றத்தாழ்வு உள்ளது அது தேவையில்லை. ஆனால், துரதிர்ஷ்டவசமாக இந்த நிலை வந்துவிட்டது. இந்த ஏற்றத்தாழ்வு எங்களுக்கு வேண்டாம். ‘‘நம் உடலில் காலில் வலி ஏற்பட்டால், மற்ற அனைத்து பாகங்களும் ஒன்றாக செயல்படத் தொடங்கி வலியில் கவனம் செலுத்துகின்றன. அதேபோல், சமூகத்தின் எந்தப் பிரிவினரும் ஒதுக்கப்படாத வகையில் சேவை செய்ய வேண்டும்.‘‘சேவை ஆரோக்கியமான சமுதாயத்தை உருவாக்குகிறது. ஆனால், அதற்கு முன், அது ஒரு தனிநபரை ஆரோக்கியமாக்குகிறது.

நம் நாட்டின் நாடோடி சமூகத்தைப் பற்றி பேசிய மோகன் பாகவத், அவர்கள் பாரதத்தின் சுதந்திரப் போராட்டத்திற்கு பங்களித்தனர். ஆங்கிலேயர்களுக்கு தலைவணங்க மறுத்து, இடம் விட்டு இடம் சுற்றித் திரிந்தனர். ஆனால், எங்கும் அவர்கள் குடியிருக்கவில்லை. அவர்களுக்கும் ஆர்.எஸ்.எஸ். சேவை செய்து வருகிறது என கூறினார்.

நிகழ்ச்சியில் மோகன் பாகவத்துக்கு முன்னதாக பேசிய உஜ்ஜைனியில் உள்ள வால்மீகி தாம்-இன் மகாந்த் ஆன பால்யோகி உமேஷ் தாஸ் நாத், துறவிகள், ஞானிகள் மற்றும் பெரிய மனிதர்கள் நாட்டில் பிரிவினைவாதத்தை தடுத்து நிறுத்தி, சனாதன தர்மத்தின் வலிமையை பராமரித்துள்ளனர் என்றார்.
பொருளாதார ஏற்றத்தாழ்வு காரணமாக, இளம் சிறுவர்களும் சிறுமிகளும் தாங்களாகவே திருமணம் செய்து கொள்ளத் தயாராக இருப்பதால், “லவ் ஜிஹாத்” வழக்குகள் அதிகரித்து வருவதாகவும் அவர் கூறினார்.

சமூக நல்லிணக்கத்தை அடைய குறைந்த பொருளாதார அடுக்குகளில் உள்ள குடும்பங்களில் தங்கள் குழந்தைகளை திருமணம் செய்து கொள்ள விருப்பம் காட்ட “பழமைவாத மக்கள்” முன்வர வேண்டும் என்றும் உமேஷ் தாஸ் நாத் கேட்டுக் கொண்டார். மாநாட்டின் இறுதி நாளான நேற்று ராஷ்ட்ரிய சேவா பாரதியின் அறங்காவலர் வினோத் பிர்லா பேசுகையில், ‘‘சேவா சங்கத்தில் சமூக மாற்றத்தின் கருத்துக்கள் நம்பிக்கையின் கதிர்களைப் பெற்றுள்ளன. இதன் மூலம் வளமான இந்தியா என்ற தீர்மானம் வரும் நாட்களில் நிறைவேறும்.

இதன் மூலம், ஒவ்வொரு வர்க்கத்தினரும், சமுதாய மக்களும் பெருமையுடன் வாழக்கூடிய அத்தகைய நாடு உருவாகும். அனைத்துத் துறைகளிலும் உறுதியான சமூக மேம்பாட்டை எளிதாக்க சேவாபாரதி முழு மனதுடன் அர்ப்பணிப்புடன் உள்ளது. பெண்களைப் பயிற்றுவிக்கவும், அதிகாரம் அளிக்கவும் இந்த அமைப்பு தொடர்ந்து முயற்சிகளை மேற்கொண்டு வருகிறது’’ என தெரிவித்தார்.

ஆர்.எஸ்.எஸ் –இன் சர்கார்யவா தத்தாத்ரேயா ஹோஸ்பால் பேசுகையில் இந்த சேவா சங்கத்தில் பகிரப்படும் அற்புதமான வெற்றி கதைகள் உலகம் முழுவதும் விளம்பரப்படுத்தப்பட வேண்டும். இந்த கதைகள் மக்களை ஊக்குவிக்கும் என கூறினார். அதேபோல் சேவா சங்கத்தில் பங்கேற்ற ராஷ்டிரிய சேவாபாரதியின் துணை தலைவர் அமிதா ஜெயின் பேசுகையில் ‘‘கடந்த 25 ஆண்டுகளாக ராஷ்டிரிய சேவா பாரதியின் பிரதிநிதிகள் மற்றும் தன்னார்வலர்கள் சிறு கிராமங்களில் சுகாதாரம், கல்வி மற்றும் வாழ்வாதார வசதிகளை வழங்குவதன் மூலம் தாழ்த்தப்பட்ட புறக்கணிக்கப்பட்ட ஏழை மக்களின் மேம்பாட்டிற்காக பணியாற்றி வருகின்றனர்.

நாராயண் சேவா என்ற கருப்பொருளில் ஏற்பாடு செய்யப்பட்டுள்ள இந்த சங்கமத்தில் இணக்கமான மற்றும் திறமையான இந்தியாவை உருவாக்குவதற்கான களம் அமைக்கப்பட்டுள்ளது. அனைத்து துறைகளிலும் உறுதியான சமூக மேம்பாட்டிற்காக சேவா பாரதி முழு மனதுடன் அர்ப்பணிப்புடன் உள்ளது. பெண்களை பயிற்றுவிக்கவும் அதிகாரம் அளிக்கவும் இந்த அமைப்பு தொடர்ந்து முயற்சிகளை மேற்கொண்டு வருகிறது என அமிதா ஜெயின் தெரிவித்தார்.

3 நாட்கள் நடைபெற்ற சேவா சங்கம் நிகழ்ச்சியில் மும்பை பிரமால் குழுமத்தின் தலைவர் அஜய் பிரமல், தொழிலதிபர் நர்சிராம் குலேரியா, அசோக் பாக்லா, சுரேஷ் ‘பையாஜி’ ஜோஷி, முகுந்த் சிஆர், மஹாமண்டலேஷ்வர் பரமன் சுவாமி மகேஷ்வரந்த், விஷ்வ ஜக்ரிதி மிஷனின் நிறுவனர் ஆச்சார்யா சுதன்ஷு மகராஜ், ராஜ்சமந்த் எம்பி தியா குமாரி உள்ளிட்ட பலர் பங்கேற்றனர்.